Ko Un

ko un foto

Poezi të zgjedhura

*

Një mizë pa njërën flatër
oshet mundimshëm
edhe një ditë tjetër po ikën

*

Disa pretendojnë të kenë një mijë vjet kujtime
të tjerë të kenë udhëtuar në një mijë vjet të ardhshëm
një ditë me erë
pres autobusin

*

Në oborr bie borë
në dhomë
askush s’e di

*

Një burrë dhe një grua përkarshi
darkojnë së bashku

gjëja më e rëndomtë
e megjithatë
më e mrekullueshmja

dashuria

*

Unë vij
nga Luani
ti
nga Shigjetari

jemi bujtës për një jetë; le të shëtisim në këtë botë e
të ikim

*

Ç’është bota?

këtu vërtitet një flutur
atje një rrjetë merimange

*

Një baba me pantallona të gjera
ngjitet mbi një urë
me bukën e të birit

pranë shkollës fillore të një qyteti me pesëdhjetë mijë banorë

*

Gjyshja thoshte
bëji gjërat më të rëndomta
madje edhe futjen
e perit në gjilpërë
me të gjitha forcat

por sot nuk e shoh më vrimën e gjilpërës

*

Macja është një egërsirë e zbutur
edhe qeni është një egërsirë e zbutur
edhe unë jam një egërsirë e zbutur

jemi larguar shumë nga origjina
tani na ka mbetur
vetëm dredhia

*

Kur zbrita pashë
këtë lule
që s’e pashë kur u ngjita

*

Pse qielli është kaq i madh
dhe unë krejt i vetëm?

*

Do vijë mosha e burrit pa nënë

në zoopark
vështrova gjatë
dy orangutangë, nënë e bir

*

Nga ana tjetër e lumit
tingulli i një kambane na erdhi të dyve
që ta dëgjonim së bashku
tingulli i një kambane na erdhi

kishim vendosur të ndaheshim
nuk ndahemi më

*

Buzë kodrës zhurma e një përroi të bukur ku luajnë fëmijët
e që nuk e di
se pas pak është deti

*

Është e vërtetë
Buda erdhi nga India
nga deti
dhe pasi mbërriti këtu
u bë një Buda i ndryshëm

ne të gjithë jemi bërë kaq të ndryshëm

*

Në orizore gjatë gjithë natës
punon një ekip prej një mijë bretkosash

*

Sa të ketë kthim dallëndyshesh
do kem një arsye për të jetuar
sa të ketë plazhe në jug
ku dallëndyshet kthehen
një arsye për të pritur të nesërmen

një arsye për të dashur kthimin tënd

*

Zhurma e ujit në ulluk
unë
dhe merimanga rrimë si vuvë gjithë ditën

*

Të mos flasim vetëm për ftohmën e egër të Siberisë
sepse nën zhegun e Siberisë
halat e një krapi të kalbur ndrisin bardhësie

*

Ndanë panjës
një thanë
ndanë thanës
një lis
ndanë lisit
gruaja ime

*

Një dritë në anën tjetër të lumit

askush s’bën pyetje
askush s’përgjigjet

Përkthyer nga Alket Çani