Guillaume Apollinaire

Guillaume Apollinaire

URA MIRABO

Poshtë urës Mirabo rrjedh lumi Senë
Dhe dashuria jonë
Ndërmend më vjen
Dhimbja përherë na sillte prapë harenë

Nata vjen ja ora tingëllon
Ditët ikin unë këtu gjithmonë

Dorë për dore kapur rrimë përkarshi
Ndërsa poshtë urës
Së krahëve tanë tani
Shkon vala e lodhur nga mijëra sy

Nata vjen ja ora tingëllon
Ditët ikin unë këtu gjithmonë

Ikën dashuria si ky ujë që shket
Ikën dashuria
Sa e ngadaltë kjo jetë
Dhe sa mizore Shpresa mund të jetë

Nata vjen ja ora tingëllon
Ditët ikin unë këtu gjithmonë

Shkojnë ditët javët shkojnë e venë
As kohë e shkuar
As dashuritë nuk kthejnë
Poshtë urës Mirabo rrjedh lumi Senë

Nata vjen ja ora tingëllon
Ditët ikin unë këtu gjithmonë

Përktheu Alket Çani